حه‌ڕاميه‌تى به‌ كافردانان و خوێن ڕشتنى موسوڵمانان به‌ناوی ئیسلام وجیهاده‌وه‌

حه‌ڕاميه‌تى به‌ كافردانان و خوێن ڕشتنى موسوڵمانان به‌ناوی ئیسلام وجیهاده‌وه‌

پێشه‌كى

الحمدلله رب العالمين والصلاة والسلام على نبينا محمد وآله وصحبه أجمعين ، وبعد.

به‌ڕێزان به‌ كافردانان و حه‌ڵاڵ كردنى ڕشتنى خوێنى موسوڵمانان به‌ ناحه‌ق نه‌خۆشيه‌كى كوشنده‌ و ترسناكه‌ ، له‌ ئايينى پيرۆزى ئيسلامدا جێگاى نابێته‌وه‌و به‌كارێكى نادروست و حه‌ڕام داندراوه‌  ، به‌ڕێزان ئه‌م نه‌خۆشيه‌ كوشنده‌يه‌ زه‌مانێكى دوورو درێژه‌ له‌ نێو جيهانى ئيسلامى دزه‌ى كردووه‌و خراوه‌ته‌ ناوى ، چه‌ند گروپ و پێشه‌وايانێكى تووندڕه‌وو ته‌كفيرى به‌ڕێوه‌ى ده‌به‌ن ، به‌ڕێزان ئه‌م نه‌خۆشيه‌ تووند ڕه‌ويه‌ ته‌كفيريه‌ سه‌رچاوه‌كه‌ى ده‌گه‌ڕێته‌وه‌ بۆ گروپێكى بيدعه‌چى به‌ناوى خه‌واريج ، كه‌ بريتين له‌و كه‌سانه‌ى له‌ سه‌رده‌مى ئيمامى عوسمان و ئيمامى عه‌لى په‌يدابوون و سه‌ريان هه‌ڵدا ، به‌هۆى نه‌فامى و كه‌م زانستيان به‌ ده‌قه‌كانى قورئان و سوننه‌ت ، شه‌يتان فريوى دان و هه‌ستان به‌ ده‌رچوون له‌ژێر خه‌لافه‌تى ئيمامى عوسمان و حه‌ڵاڵكردنى ڕشتنى خوێنى و شه‌هيد كردنى له‌به‌رده‌م ماڵ و منداڵى له‌ شارى مه‌دينه‌ى پێغه‌مبه‌رى خوا (صلی الله‌ علیه‌ وسلم) ، وه‌ له‌ دواى ڕشتنى خوێنى ئيمامى عوسمان هه‌ستان به‌ به‌كافر دانان و حه‌ڵاڵ كردنى ڕشتنى خوێنى خه‌ليفه‌ى چواره‌مى موسوڵمان ئيمامى عه‌لى (ڕه‌زاى خواى په‌روه‌ردگاريان لێبێت) ، به‌ڕێزان بير له‌ترسناكى و توندره‌وى خه‌واريجه‌كان بكه‌نه‌وه‌ ئه‌گه‌ر كه‌سێكى وه‌كو ئيمامى عوسمان و ئيمامى عه‌لى له‌ ژێر ده‌ست و زمانيان سه‌لامه‌ت نه‌بن ، چۆن موسوڵمانانى تر له‌ژێر ده‌ست و زمانيان سه‌لامه‌ت ده‌بن ، له‌كاتێكدا ئه‌م دوو خه‌ليفه‌ به‌ڕێزه‌ هه‌ر له‌دونيادا پێغه‌مبه‌رى خوا (صلی الله‌ علیه‌ وسلم) مژده‌ى به‌هه‌شتى پێدابوون ،  به‌ڕێزان مه‌نهه‌جى سه‌له‌فيه‌ت كه‌ بريتى يه‌ له‌ ڕێبازه‌ ڕاسته‌كه‌ى ئيسلام به‌رى يه‌  له‌م ئه‌فكاره‌ توندڕه‌ويه‌ى ئه‌م گروپه‌ گومڕاو سه‌رلێشێواوه‌ په‌يڕه‌وى ده‌كه‌ن له‌هه‌موو شوێن و زه‌مه‌نێكدا ، هه‌ر ئه‌م گرووپه‌ گومڕايه‌ن ئايينى ئيسلاميان له‌به‌ر چاوى كافر و بێ باوه‌ڕان به‌ ئاينى تيرور و ئيرهاب ناساندووه‌ ، كه‌چى له‌ ڕاستى دا ئاينى ئيسلام ئايينى ڕه‌حم و به‌زه‌ييه‌ بۆ گشت مرۆڤايه‌تى ، خواى گه‌وره‌ ده‌فه‌رموێت : ( وَمَا أَرْسَلْنَاكَ إِلَّا رَحْمَةً لِلْعَالَمِينَ )الأنبياء: ١٠٧ . واته‌ : ئه‌ى محمد (صلی الله‌ علیه‌ وسلم) تۆمان نه‌ناردووه‌ ته‌نها به‌ڕه‌حمه‌ت نه‌بێت بۆ گشت جيهانيان واته‌ دروست كراوان .

به‌ڕێزان دووباره‌ ده‌يڵێمه‌وه‌ مه‌نهه‌جى سه‌له‌فيه‌ت و سه‌له‌فيه‌كان دوورن و به‌رين له‌ ئه‌فكارو توندره‌وى ئه‌م گومرايانه‌ له‌ هه‌موو كات و سه‌رده‌مێكدا ، به‌به‌ڵگه‌ى ئه‌وه‌ى ئه‌م توند ڕه‌وانه‌ تۆمه‌ت و بوهتان ئه‌ده‌نه‌ پاڵ سه‌له‌فيه‌كان و پێان ده‌ڵێن مورجيئه‌و به‌كرێگيراوانى ده‌سه‌ڵات ، هه‌ربه‌وه‌ نه‌وه‌ستاون به‌ڵكو هه‌ستاون به‌ به‌كافردانان و حه‌ڵاڵكردنى ڕشتنى خوێنيشيان ، هۆكاره‌كه‌شى بۆ ئه‌وه‌ ده‌گه‌ڕێته‌وه‌ داخوه‌ سه‌له‌فيه‌كان وه‌كو ئه‌وان نين له‌به‌كافردانان و سوور كردنى ده‌ستيان به‌خوێنى موسڵمانان له‌ برا پێشمه‌رگه‌و پۆليسه‌ موسوڵمانه‌كانى كوردستانى خۆشه‌ويستمان ، به‌ڕاستى ئه‌و كه‌سانه‌ى كه‌به‌ڕاست سه‌له‌فين مايه‌ى ئه‌من و ئاسايشن بۆ ووڵات ، چونكه‌ هه‌ر ماموستايانى سه‌له‌فين به‌خه‌ڵكى ده‌ڵين به‌بێ به‌ڵگه‌و نه‌فامى موسوڵمانان كافر مه‌كن ، وه‌ له‌ ژێر ده‌سه‌ڵاتى سه‌ركرده‌ى موسوڵمان ده‌رمه‌چوون و دژايه‌تى مه‌كه‌ن ، وه‌ خۆپيشاندان مه‌كه‌ن بۆ ئه‌وه‌ى خوێن و ماڵ و ئه‌من و ئاساييشى ووڵات سه‌لامه‌ت بێت ، وه‌ زۆر سوودو قازانجى تريان هه‌يه‌ بۆ دين و دونياى خه‌ڵك ، بۆيه‌ به‌ڕاستى سته‌م و تاوانێكى  گه‌وره‌يه‌ تۆمه‌تى تيرۆرستى و توندره‌ويه‌تى بدرێته‌ پاڵ ئه‌و كه‌ سانه‌ى كه‌به‌راست سه‌له‌فين ، نه‌ك ئه‌و كه‌سانه‌ى كه‌ناوى سه‌له‌فى له‌خۆ ده‌نێن و له‌ژێر ئه‌م ناوه‌ پاكه‌ ژه‌هرى خۆيان ده‌ڕێژن و ئيسلام له‌به‌ر چاوى بێباوه‌رو نه‌زانان ناشرين ده‌كه‌ن ، ئه‌و كه‌سه‌ به‌ڕاست سه‌له‌فيه‌ كه‌ كرده‌وه‌ بكات به‌ئايينى ئيسلام دوور له‌توند ڕه‌وى و شلڕه‌وى ، به‌ڵكو به‌مام ناوه‌ندى و ده‌ست گرتن به‌ڕێبازى پێغه‌مبه‌رى خوا (صلی الله‌ علیه‌ وسلم) .

((به‌ڵگه‌كانى قورئان و سوننه‌ت له‌سه‌ر حه‌ڕاميه‌تى به‌ كافر دانان و خوێن ڕشتنى موسوڵمانان به‌ ناحه‌ق ))

1.خواى گه‌وره‌ له‌ قورئانه‌ پيرۆزه‌كه‌يدا سه‌باره‌ت به‌حه‌راميه‌تى خوێن ڕشتنى باوه‌رداران  ده‌فه‌رموێت : ( وَمَنْ يَقْتُلْ مُؤْمِنًا مُتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا ) النساء: ٩٣ . واته‌ : خواى گه‌وره‌ فه‌رموويه‌تى : هه‌ركه‌سێك باوه‌ردارێك به‌ده‌ستى ئه‌نقه‌ست بكوژێ سزاو تۆڵه‌ى ناو ئاگرى دۆزه‌خه‌ به‌هه‌تا هه‌تايى ، وه‌ تووڕه‌يى و نه‌فره‌تى خواى له‌سه‌ره‌ ، وه‌ سزايه‌كى گه‌وره‌و قورسيشى بۆ ئاماده‌ كردووه‌ .

2. وه‌ سه‌باره‌ت به‌حه‌ڕاميه‌تى به‌كافردانانى موسوڵمانان ده‌فه‌رمووێت : ( يَا أَيُّهَا الَّذِينَ آَمَنُوا إِذَا ضَرَبْتُمْ فِي سَبِيلِ اللَّهِ فَتَبَيَّنُوا وَلَا تَقُولُوا لِمَنْ أَلْقَى إِلَيْكُمُ السَّلَامَ لَسْتَ مُؤْمِنًا تَبْتَغُونَ عَرَضَ الْحَيَاةِ الدُّنْيَا  ) النساء: ٩٤.  واته‌: ئه‌ى ئه‌وكه‌سانه‌ى باوه‌ڕتان هێناوه‌ ! كاتێ له‌به‌ر رێى خوا ده‌چنه‌ جيهاد ، يان هه‌ركارێكى تر ده‌كه‌ن به‌باشى بكۆڵنه‌وه‌ له‌و خه‌ڵكه‌ى پێيان ده‌گه‌ن و له‌خۆتانه‌وه‌ به‌ كافريان دامه‌نێن و مه‌يانكوژن ، وه‌ ئه‌وكه‌سه‌ى داواى ئاشتيى ده‌كاو ده‌يه‌وێ فه‌رمانبه‌ردار بێ ، ئێوه‌ پێى مه‌ڵێن : ئيماندار نيت ، ده‌تانه‌وێ به‌وه‌ سامان و داراييه‌كى ژيانى دونيا به‌ده‌ست بخه‌ن .

3.عَنْ عَبْدِ اللهِ بْنِ عُمَرَ ، رَضِيَ اللَّهُ عَنْهُمَا أَنَّ رَسُولَ اللهِ (صلی الله‌ علیه‌ وسلم) قَالَ : (أَيُّمَا رَجُلٍ قَالَ لأَخِيهِ يَا كَافِرُ فَقَدْ بَاءَ بِهَا أَحَدُهُمَا).صحيح البخاري : 6104 . واته‌: له‌ عبدالله ى كوڕى عومه‌ره‌وه‌ (ڕه‌زاى خواى گه‌وره‌يان لێبێت) ووتى : پێغه‌مبه‌رى خوا (صلی الله‌ علیه‌ وسلم) فه‌رمووى: هه‌ر پياوێك به‌ براكه‌ى بڵێت (كافر) به‌ ته‌ئكيد يه‌كێكيان به‌م كافر بوونه‌ ده‌گه‌ڕێته‌وه‌و كافر ده‌بێت .

4. عَنْ ثَابِتِ بْنِ الضَّحَّاكِ ، عَنِ النَّبِيِّ (صلی الله‌ علیه‌ وسلم) قَالَ : مَنْ رَمَى مُؤْمِنًا بِكُفْرٍ فَهْوَ كَقَتْلِهِ . صحيح البخاري : 6105 . واته‌: له‌ ثابتى كوڕى (ضَحَّاكَه) وه‌ ، ووتى پێغه‌مبه‌رى خوا (صلی الله‌ علیه‌ وسلم) فه‌رمووى : هه‌ركه‌سێك باوه‌ڕدارێك به‌ كوفر تۆمه‌تبار بكات وه‌كو كوشتنى وايه‌ ، (واته‌ هه‌ر كه‌سێك به‌ باوه‌ڕدارێك بڵێت (كافر) وه‌كو ئه‌وه‌ وايه‌ بيكوشتبێت) .

5. عَنْ أَبِي سَعِيدٍ قَالَ: قَالَ رَسُولُ اللَّهِ (صلی الله‌ علیه‌ وسلم): (مَا أَكْفَرَ رجُلٌ رَجُلًا قَطُّ؛ إِلا بَاءَ أَحَدُهُمَا بِهَا إِنْ كَانَ كافراً وإلا كَفَرَ بتكفيره) . ((الصحيحة)) (2891) . واته‌ : له‌ باوكى سه‌عيده‌وه‌ ووتى : پێغه‌مبه‌رى خوا (صلی الله‌ علیه‌ وسلم) فه‌رمووى : هيچ پياوێك پياوێك كافر ناكات ، ئيلا يه‌كێكيان به‌م كافر كردنه‌ ده‌گه‌ڕێته‌وه‌ ، ئه‌گه‌ر كه‌سه‌ كافر كراوه‌كه‌ به‌ڕاست كافر بێت ئه‌وه‌ كافره‌ ، ئه‌گه‌ر نا كه‌سه‌ به‌كافر دانه‌ره‌كه‌ به‌خۆى كافر ده‌بێت .

6. عن أبي هُرَيْرَةَ سَمِعْتُ رَسُولَ اللَّهِ صَلَّى اللهُ عَلَيْهِ وَسَلَّمَ يَقُولُ: " كَانَ رَجُلَانِ فِي بَنِي إِسْرَائِيلَ مُتَوَاخِيَيْنِ، فَكَانَ أَحَدُهُمَا يُذْنِبُ، وَالْآخَرُ مُجْتَهِدٌ فِي الْعِبَادَةِ، فَكَانَ لَا يَزَالُ الْمُجْتَهِدُ يَرَى الْآخَرَ عَلَى الذَّنْبِ فَيَقُولُ: أَقْصِرْ، فَوَجَدَهُ يَوْمًا عَلَى ذَنْبٍ فَقَالَ لَهُ: أَقْصِرْ، فَقَالَ: خَلِّنِي وَرَبِّي أَبُعِثْتَ عَلَيَّ رَقِيبًا؟ فَقَالَ: وَاللَّهِ لَا يَغْفِرُ اللَّهُ لَكَ، أَوْ لَا يُدْخِلُكَ اللَّهُ الْجَنَّةَ، فَقَبَضَ أَرْوَاحَهُمَا، فَاجْتَمَعَا عِنْدَ رَبِّ الْعَالَمِينَ فَقَالَ لِهَذَا الْمُجْتَهِدِ: أَكُنْتَ بِي عَالِمًا، أَوْ كُنْتَ عَلَى مَا فِي يَدِي قَادِرًا؟ وَقَالَ لِلْمُذْنِبِ: اذْهَبْ فَادْخُلِ الْجَنَّةَ بِرَحْمَتِي، وَقَالَ لِلْآخَرِ: اذْهَبُوا بِهِ إِلَى النَّارِ " قَالَ أَبُو هُرَيْرَةَ: وَالَّذِي نَفْسِي بِيَدِهِ لَتَكَلَّمَ بِكَلِمَةٍ أَوْبَقَتْ دُنْيَاهُ وَآخِرَتَهُ. . صحيح، المشكاة (2347 / التحقيق الثاني) ، صحيح وضعيف سنن أبي داود: 4901 . واته‌ : له‌ باوكى هوڕه‌يڕه‌وه‌ (ڕه‌زاى خواى گه‌وره‌ى لێبێت): ووتى : گوێبيستى پێغه‌مبه‌رى خوا بووم (صلی الله‌ علیه‌ وسلم) ده‌يفه‌رموو : دوو پياو هه‌بوون له‌ به‌نى ئيسرائيليه‌كانى پێش ئيسلام ، ئه‌م دوو پياوه‌ هاوڕێى يه‌كتر بوون ، يه‌كێكيان تاوان و سه‌رپێچى خواى ده‌كرد ، وه‌ ئه‌وى تريان زۆر عيباده‌تى خواى ده‌كرد ، ئه‌وه‌ى زۆر عيباده‌تى ده‌كرد به‌رده‌وام هاوڕێكه‌ى له‌سه‌ر خراپه‌ و تاوان ده‌بينى و پێى ده‌ووت به‌سه‌ واز بێنه‌ له‌ تاوان ، ڕۆژێكيان له‌سه‌ر تاوانێكى بينى پێى ووت به‌سه‌ واز بێنه‌ ، تاوان باره‌كه‌ پێى ووت : وازم لێ بێنه‌ ئه‌مه‌ له‌ نێوان خۆم و په‌روه‌ردگارمه‌ ، ئايه‌ تۆ به‌ چاودێر به‌سه‌رم دا نێردراوى ، پياوه‌ عيباده‌ت كاره‌كه‌ پێى ووت : سوێند به‌ خوا ، خواى گه‌وره‌ له‌ تۆ خۆش نابێت يان ناتباته‌ به‌هه‌شته‌وه‌ ، خواى گه‌وره‌ هه‌ردوكيانى مراندن و له‌ لاى خواى په‌روه‌ردگار ئاماده‌ بوون ، خواى گه‌وره‌ به‌ كه‌سه‌ عابيده‌كه‌ى فه‌رموو : ئايا تۆ زانستت به‌ من هه‌يه‌ كه‌ لێى خۆش نابم يان توانات به‌سه‌ر ئه‌م شتانه‌ هه‌يه‌ كه‌ له‌ ژێر ده‌ستى مندايه‌ (تۆ چوزانى خواى گه‌وره‌ له‌م كه‌سه‌ خۆش نابێ و نايباته‌ به‌هه‌شت) ، ئينجا به‌ كه‌سه‌ تاوانباره‌كه‌ى فه‌رموو : بڕۆ بۆ ناو به‌هه‌شت به‌ ڕه‌حم و به‌ زه‌يى خۆم ، وه‌ به‌ پياوه‌كه‌ى ترى فه‌رموو : بڕۆن بيبه‌ن به‌ره‌و ئاگر ، باوكى هوڕه‌يڕه‌ ووتى : سوێند به‌وه‌ى نه‌فسى منى به‌ ده‌سته‌ ، ئه‌م پياوه‌ عابيده‌ قسه‌يه‌كى واى به‌ پياوه‌ تاوانباره‌كه‌ ووت ، به‌هۆى ئه‌م قسه‌يه‌وه‌ دونيا و ئاخيره‌تى له‌ ده‌ست خۆ دا و به‌ هيلاك چوو .

7. قَالَ عُمَرُ لِحَاطِبٍ إِنَّهُ مُنَافِقٌ فَقَالَ النَّبِيُّ صلى الله عليه وسلم وَمَا يُدْرِيكَ لَعَلَّ اللَّهَ قَدِ اطَّلَعَ إِلَى أَهْلِ بَدْرٍ فَقَالَ : قَدْ غَفَرْتُ لَكُمْ. صحيح البخاري : 74 . واته‌ : عومه‌رى كوڕى خه‌تاب (ڕه‌زاى خواى گه‌وره‌ى لێبێت) به‌ حاتب ى كوڕى به‌لته‌عه‌ى فه‌رموو: حاتب مونافيقه‌ (به‌هۆى ناردنى نامه‌يه‌كى بۆ موشريكه‌كانى قوڕه‌يشى شارى مه‌ككه‌ ، بۆ ئه‌وه‌ى له‌كاتى فه‌تحى مه‌ككه‌دا پارێزگارى ماڵ و منداڵه‌كه‌ى بكه‌ن و ده‌ست درێژيان نه‌كه‌نه‌ سه‌ر ) ، به‌ڵام له‌ وه‌ڵامدا پێغه‌مبه‌رى خوا (صلی الله‌ علیه‌ وسلم) پێى فه‌رموو تۆ چوزانى مونافيقه‌ ، خواى گه‌وره‌ به‌ ئه‌هلى به‌درى فه‌رمووه‌ له‌ ئێوه‌ خۆش بووم (حاتب يه‌كێك بوو له‌و سه‌حابه‌ به‌ڕێزانه‌ى له‌ شه‌ڕى به‌در به‌رامبه‌ر موشريكه‌كان جه‌نگابوو) .

8. عَنْ عَبْدِ اللَّهِ بْنِ عُمَرَ؛ أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ: " إِذَا قَالَ لِلْآخَرِ: كَافِرٌ، فَقَدْ كَفَرَ أَحَدُهُمَا، إِنْ كَانَ الَّذِي قَالَ لَهُ كَافِرًا؛ فَقَدْ صَدَقَ؛ وَإِنْ لَمْ يَكُنْ كَمَا قَالَ لَهُ، فَقَدْ بَاءَ الَّذِي قَالَ لَهُ بِالْكُفْرِ".(صحيح) ، صحيح الأدب المفرد للإمام البخاري: 341/440. واته‌: له‌ عبدالله ى كوڕى عومه‌ره‌وه‌ (ڕه‌زاى خواى گه‌وره‌يان لێبێت) ووتى : پێغه‌مبه‌رى خوا (صلی الله‌ علیه‌ وسلم) فه‌رمووى : هه‌ر كه‌سێك به‌ يه‌كێكى تر بڵێت (كافر) ئه‌وه‌ يه‌كێكيان كافر ده‌بێت ، ئه‌گه‌ر ئه‌و كه‌سه‌ى پێى ووترا كافر به‌ڕاست كافر بێت ، ئه‌وه‌ ڕاستى كردووه‌ له‌ ته‌كفيركردنه‌كه‌ى ، به‌ڵام ئه‌گه‌ر كافر نه‌بێت ئه‌وه‌ كوفره‌كه‌ بۆ ئه‌و كه‌سه‌ ده‌گه‌ڕێته‌وه‌ كه‌ ووشه‌ى كافر بوونى بۆ غه‌يرى خۆى به‌كار هێناوه‌ .

9. وه‌ له‌ فه‌رمووده‌يه‌كى سه‌حيحى تردا هاتووه‌ سه‌حابه‌يكى به‌ڕێز به‌ناوى ئوسامه‌ى كوڕى زيد له‌كاتى جيهاد كردندا له‌ گه‌ڵ موشريكه‌كان ، يه‌كێك له‌ موشريكه‌كان ده‌كوژێت له‌دواى شايه‌تمانى ئه‌م موشريكه‌ به‌ ووتنى (لااله‌ الا الله) ، كاتێك ئه‌م هه‌واڵه‌ به‌ پێغه‌مبه‌رى خوا (صلی الله‌ علیه‌ وسلم) ده‌گات ، زۆر له‌ ئوسامه‌ تووڕه‌ ده‌بێت و پێى ده‌فه‌رمووێت :( يَا أُسَامَةُ أَقَتَلْتَهُ بَعْدَ مَا قَالَ : لاَ إِلَهَ إِلاَّ اللَّهُ ) واته‌ : ئه‌ى ئوسامه‌ ئه‌م پياوه‌ت كوشت له‌ دواى ئه‌وه‌ى ووتى (لا إله‌ إلا الله) ، ئوسامه‌ له‌وه‌ڵامدا ووتى : ئه‌ى پێغه‌مبه‌رى خوا (صلی الله‌ علیه‌ وسلم) ئه‌م پياوه‌ له‌م شايه‌تمانه‌ مه‌به‌ستى خۆپاراستن بوو له‌ كوشتن ، به‌ڵام پێغه‌مبه‌رى خوا (صلی الله‌ علیه‌ وسلم) هه‌ر پێى ده‌فه‌رموو ئه‌م پياوه‌ت كوشت له‌ دواى ئه‌وه‌ى ووتى: (لا إله إلا الله) ، ئوسامه‌ ووتى : پێغه‌مبه‌ر (صلی الله‌ علیه‌ وسلم) به‌رده‌وام ئه‌م ووشه‌يه‌ى دوباره‌ ده‌كرده‌وه‌ هه‌تا خۆزگه‌م ئه‌خواست له‌ پێش ئه‌و ڕۆژه‌دا هه‌ر موسوڵمان نه‌بوومايه‌و تازه‌ موسوڵمان بوومايه‌ . البخاري :4269 ، ومسلم: 288 . له‌ ڕيوايه‌تێكى تردا هاتووه‌ به‌ ئوسامه‌ ده‌فه‌رموێت : (ئايه‌ تۆ دڵت شه‌ق كردبوو هه‌تا بزانى له‌ ترسى خۆپاراستنى له‌ كوشتن ئه‌م شايه‌تمانه‌ى هێنابێ ؟ چى ده‌كه‌ى به‌ (لا إله إلا الله) له‌ ڕۆژى دواييدا) . صحيح الجامع: 4419. له‌ فه‌رمووده‌يه‌كى تردا  ده‌فه‌رموێت : (من فرمانم پێ نه‌كراوه‌ به‌ كون كردنى دڵى خه‌ڵك وه‌ شه‌ق كردنى زگيان هه‌تا بزانم ئايه‌ باوه‌ڕدارن يان بێ باوه‌ڕن) . صحيح مسلم : 1064 .

10. عَنْ أَبِي ذَرٍّ ، (ڕه‌زای خوای لێبێت) ، أَنَّهُ سَمِعَ النَّبِيَّ (صلی الله‌ علیه‌ وسلم) يَقُولُ (مَن دَعَا رَجلاً بِالكفرِ أو قالَ عدوَّ اللهِ و ليسَ كذلك إلا حارَ عليه ، ولَا يَرْمِي رَجُلٌ رَجُلًا بِالْفُسُوقِ وَلَا يَرْمِيهِ بِالْكُفْرِ إِلَّا ارْتَدَّتْ عَلَيْهِ إِنْ لَمْ يَكُنْ صَاحِبُهُ كَذَلِكَ ). ( صحيح )  حديث رقم : 5431 في صحيح الجامع: 9562 .  واته‌ : له‌ باوكى ( ذَرَّ ) ه‌وه‌(ڕه‌زاى خواى گه‌وره‌ى لێبێت) له‌ پێغه‌مبه‌رى خواى بيستووه‌ (صلی الله‌ علیه‌ وسلم) ده‌يفه‌رموو : ( هه‌ر كه‌سێك بانگى پياوێك بكات به‌ كوفر ، يان پێى بڵێت دوژمنى  خوا ئه‌گه‌ر وا نه‌بێت ، واته‌ پياوه‌كه‌ كافر نه‌بێت يان دوژمنى خوا نه‌بێت ئيلا بۆ خۆى ده‌گه‌ڕێته‌وه‌ ، واته‌: به‌خۆى كافر ده‌بێت يان ده‌بێت به‌ دوژمنى خوا ، وه‌ هيچ پياوێك نيه‌ پياوێكى تر تۆمه‌تبار بكات به‌ فسق يان به‌ كوفر ئيلا ئه‌م فسق و كوفره‌ى بۆ خۆى ده‌گه‌ڕێته‌وه‌ ئه‌گه‌ر ئه‌م كه‌سه‌ فاسق و كافر نه‌بێت .

11. قَالَ رَسُولُ اللَّهِ (صلی الله‌ علیه‌ وسلم) (كُلُّ الْمُسْلِمِ عَلَى الْمُسْلِمِ حَرَامٌ دَمُهُ وَمَالُهُ وَعِرْضُهُ) صحيح مسلم: 6706 . واته‌ : پێغه‌مبه‌رى خوا (صلی الله‌ علیه‌ وسلم) فه‌رمووى : هه‌موو موسوڵمانێك به‌سه‌ر موسوڵمانه‌وه‌ حه‌ڕامه‌ خوێنه‌كه‌ى ، وه‌ ماڵه‌كه‌ى ، وه‌ نامووسه‌كه‌ى .

12. قَالَ رَسُولُ اللهِ (صلی الله‌ علیه‌ وسلم) :«لَوْ أَنَّ أَهْلَ السَّمَاءِ وَالْأَرْضِ اشْتَرَكُوا فِي دَمِ مُؤْمِنٍ لَأَكَبَّهُمُ اللَّهُ فِي النَّارِ» صحيح الجامع : 5247 . واته‌ : پێغه‌مبه‌رى خوا (صلی الله‌ علیه‌ وسلم) فه‌رمووى : ئه‌گه‌ر ئه‌هلى ئاسمان و زه‌وى شه‌ريك بن له‌ڕشتنى خوێنى باوه‌ردارێك خواى گه‌وره‌ گشتيان فره‌داته‌ ناو ئاگرى دۆزه‌خ .

له‌كۆتاييدا دواكارم له‌خواى گه‌وره‌ و ميهره‌بان هيدايه‌تمان بدات بۆ ريبازه‌ ڕاسته‌كه‌ى ئيسلام ، كه‌ ده‌ست گرتنه‌ به‌رێبازى پێغه‌مبه‌رى خواو هاوه‌ڵه‌ به‌ڕێزه‌كانى ، وه‌ به‌دوورمان بگرێت له‌ڕێبازى ئه‌م حه‌فتاو دوو گرووپه‌ گومڕايه‌ى هه‌ڕه‌شه‌ى چوونه‌ ناو دۆزه‌خيان لێكراوه‌ ، به‌هۆى لادانيان له‌ڕێبازه‌ ڕاسته‌كه‌ى ئيسلام .

وصلى الله على نبينا محمد وآله وصحبه وسلم

16 ي شوال / 1435 ه –  سؤران -12 / 8 / 2014 م

ئامادةكردنى : مامۆستا هه‌ڵگور مصطفى گه‌ڵاڵه‌يى