حوكمی به‌شه‌رهێنانی گیانله‌به‌ران و به‌گژیه‌كتربردنیان

زانایان فه‌رمویانه‌ حه‌ڕامه‌ و دروست نیه‌ گیانله‌به‌ران به‌شه‌ڕبنرێن و به‌گژیه‌كدا ببرێن ؛  بێگومان ئه‌م كاره‌ حه‌ڕامه‌ ؛ وه‌ پاره‌ له‌سه‌ر وه‌رگتنیشی حه‌ڕامه‌ ؛ چونكه‌ ئه‌مه‌ ئه‌زیه‌تدانی گیانله‌به‌رانه‌ و ماندووكردنیانه‌ له‌شتێكی بێ سوود و ناشه‌رعی ؛ پێغه‌مبه‌ری خوا صلی الله علیه وسلم نه‌هی كردووه‌ و نه‌فه‌رتی كردوه‌ له‌وكه‌سانه‌ی گیانله‌به‌ران ده‌كه‌نه‌ نیشانه‌یه‌ك و ده‌یانكوژن و ئه‌زیه‌تیان ده‌ده‌ن - به‌بێ حاله‌تی ڕاوكردن - ؛ جا ئه‌م ئه‌زیه‌تدانه‌ چ به‌ده‌ستی مرۆڤه‌كان بێت یان به (‌شه‌ڕ ) و ( ناكۆكی ) دروست كردن بێت له‌نێوانیان هه‌ر حه‌رامه‌ و دروست نیه‌ و بێ ره‌حمی و بێ به‌زه‌ییه‌ .

 ئایه‌ كێ هه‌یه‌ حه‌زبكات شه‌ر و ناكۆكی بخرێته‌ نێوان منداڵه‌كانی یان خۆی و كه‌سانی تر بێ ئه‌وه‌ی له‌یه‌كیان بكه‌نه‌وه‌ و یه‌كتر ئه‌زیه‌ت و برینداربكه‌ن  ؟!

بۆیه‌  ئاگاربن ئه‌م كاره‌ تاوان و سته‌مه‌ و گیانله‌به‌رانیش وه‌ك ئێمه‌ دروستكراوی خوان ؛  هه‌ست به‌ئه‌زیه‌ت و ناخۆشی ده‌كه‌ن ؛ به‌باش بوون له‌گه‌ڵیان خێر و پاداشتت ده‌ست ده‌كه‌وێت ؛ وه‌ به‌خراپ بوون له‌گه‌ڵیان سزاو تاوانت ده‌ست ده‌كه‌وێت .

پێغه‌مبه‌ری خوا صلی الله علیه وسلم فه‌رمویه‌تی : ئافره‌تێكی زیناكار به‌هۆی ئاودانی به‌ سه‌گێكی تێنوو خوا لێی خۆش بوو و ده‌یباته‌ به‌هه‌شت ؛ وه‌ ئافره‌تێك به‌هۆی برسی كردن و تێنوو كردنی پشیله‌یه‌ك و به‌ندكردنی هه‌تا مردن شاییسته‌ی ئاگری دۆزه‌خ ده‌بێت و له‌رۆژی دوایی ده‌خرێته‌ دۆزه‌خ !

وصلی الله علی نبینا محمد و علی آله وصحبه وسلم .

نوسینی : مامۆستا هه‌لگورد گه‌ڵاڵه‌یی .

21 / 11 / 2020