شه‌و نوێژ

فه‌زڵ و هۆكار و به‌رهه‌م و چۆنیه‌تی و كاتی ئه‌نجامدانی 

فه‌زڵ و تایبه‌تمه‌ندیه‌كانی شه‌و نوێژ :

1_ باشترین نوێژه‌ له‌دوای نوێژه‌ فه‌ڕزه‌كان .

2_ شه‌ڕه‌ف و پایه‌به‌رزیه‌ بۆ باوه‌ڕدار .

3_ خوو و ڕه‌وشتی پیاوچاكانه‌ .

4_ ئه‌نجامدانی له‌كۆتایی شه‌و كاتی دابه‌زینی خوای په‌روه‌ردگاره‌ بۆ ئاسمانی دونیا .

5_ ئه‌م نوێژه‌ زیاتر له‌كاتی ته‌نیایی ده‌كرێت و دووره‌ له‌ڕیایی  .

6_ پێغه‌مبه‌ری خوا – صلی الله علیه وسلم – به‌رده‌وام شه‌ونوێژی ده‌كرد ؛ وه‌ زۆر ئامۆژگاری باوه‌ڕدارانی كردووه‌ به‌ ئه‌نجامدانی .

هۆكاره‌كانی هه‌ستانه‌وه‌ بۆ شه‌و نوێژ :

1_ دوعاكردن .

2_ پارێزگاری كردن له‌ نوێژه‌ فه‌رزه‌كان .

3_ دره‌نگ نه‌خه‌وتن .

4_ خه‌وتنێكی كه‌م له‌پێش نیوه‌رۆ یان دوای نیوه‌رۆ كه‌ به‌عه‌ڕه‌بی پێی ده‌وترێت قه‌یلوله‌ .

5_ وازهێنان له‌گوناه و تاوان ؛ پیاوێك به‌حه‌سه‌نی به‌صری فه‌رموو : توانای شه‌و نوێژ كردنمان نیه‌ ! پێی فه‌رموو : تاوانه‌كانتان ئێوه‌ی به‌ستۆته‌وه‌ .

6_ تێكۆشان له‌گه‌ڵ نه‌فس و زاڵ بوون به‌سه‌ریدا .

7_ به‌كارهێنانی هۆكاره‌كانی به‌خه‌به‌رهاتن و هه‌ستانه‌وه‌ بۆی ؛ وه‌ك ته‌له‌فۆن یان ته‌وقیت دانان به‌كاتژمێر ؛ یان داواكردن له‌كه‌سێك بۆ ئه‌وه‌ی بانگی بكات و هه‌لی بستێنێت .

به‌رهه‌مه‌كانی شه‌و نوێژ :

1_ نزیك بوونه‌وه‌ له‌خوای په‌روه‌ردگار .

2_ ڕێگره‌ له‌ئه‌نجامدانی گوناه و تاوان .

3_ كه‌فاره‌تی تاوانه‌كانه‌ .

4_ هۆكاری چاره‌سه‌ری نه‌خۆشیه‌ له‌لاشه‌دا .

5_ هۆكاری به‌رزبوونه‌وه‌ی پله‌یه‌ .

6_ خۆچوانده‌ به‌پیاوچاكانی ڕۆییشتوو له‌سه‌ر ئه‌م عیباده‌ته‌ .

7- هۆكاره‌ بۆ ئه‌نجامدانی نوێژی به‌یانی له‌كاتی خۆیدا .

8_ هۆكاره‌ بۆ به‌رده‌وام وتنه‌وه‌ی قوڕئان و موڕاجه‌عه‌ كردنه‌وه‌ی .

9_ ده‌رگایه‌كه‌ له‌ده‌رگاكانی چاكه‌ .

10 _ شه‌ڕه‌ف و پایه‌به‌رزی باوه‌ڕداره‌ .

چۆنیه‌تی ئه‌نجامدانی :

شه‌و نوێژ پێك هاتووه‌ له‌ يازده‌ ڕكه‌عه‌ت ، نوێژه‌كان دوو ڕكه‌عه‌ت دوو ڕكه‌عه‌ت ده‌كرێن پاشان له‌ كۆتايى يه‌ك ڕكه‌عه‌ت ده‌كرێت كه‌ پێى ده‌وترێت (وتر) .

وه‌ هه‌ندێك له‌ زانايان – ڕه‌حمه‌تی خوایان لێبێت – فه‌رمویانه‌ : شه‌و نوێژ به‌ يازده‌ ڕكه‌عه‌ت زياتريش بێت دروسته‌ و ئاساییه‌ گرنگ ئه‌وه‌یه‌ له‌كۆتایی وتر بكه‌ی ؛ وه‌ نابێت له‌شه‌وێكدا دوو وتربكه‌ی ؛ وه‌ له‌دوای شه‌ونوێژ و وتر كاتێك شه‌و خه‌به‌رت ده‌بێته‌وه‌ دروسته‌ نوێژی سونه‌ت بكه‌ی به‌مه‌رجێك وتر دوباره‌ نه‌كه‌یته‌وه‌ .

كاتی ئه‌نجامدانی شه‌و نوێژ :

شه‌ونوێژ كاته‌كه‌ی له‌دوای نوێژی عیشاوه‌ ده‌ست پێ ده‌كات هه‌تا پێش بانگی به‌یانی ؛ هه‌ركاتێك له‌م كاتانه‌ شه‌و نوێژ بكه‌ی دروسته‌ و ئاساییه‌ ؛ وه‌ واجب نیه‌ ئیلا ده‌بێت بخه‌وی پاشان هه‌ڵبستیته‌وه‌  شه‌ونوێژ بكه‌ی ؛ به‌ڵام باشترین كات بۆ شه‌و نوێژكردن سعاتێك یان زیاتر پێش نوێژی به‌یانیه‌ كه‌ پێی ده‌وترێت سێیه‌كی كۆتایی شه‌و .

په‌رتوكی : الدلیل العلمي : 35 - 36 .

وه‌رگێڕانی : مامۆستا هه‌ڵگورد مصطفى گه‌ڵاڵه‌یی .

16 / رجب / 1442 = 28 / 2 / 2021