ئامۆژگاریه‌كی گرنگ بۆ خوشكانی باوه‌ڕدار ..

سه‌باره‌ت به‌سه‌یر كردنی وێنه‌ و ڤیدیۆی مامۆستایانی ئایینی و قوڕئان خوێنان ..

خوشكی باوه‌ردار ئاگاداربه‌ شه‌یتان فێڵت لێ نه‌كات و تووشی گوناه و تاوانت نه‌كات !

حوكمی سه‌یری كردنی پیاوی نامه‌حره‌م ئه‌گه‌ر به‌شه‌هوه‌ت و چێژلێوه‌رگرتن و كاریگه‌ربوون پێیه‌وه‌ بێت ئه‌وا به‌ كۆ ده‌نگی زانایان به‌ به‌ڵگه‌ی قورئان و فه‌رموده‌ حه‌ڕامه‌  .

به‌ڵام هه‌ندێك له‌زانایان نه‌ك هه‌مویان ؛ فه‌رمویانه‌ : ئه‌گه‌ر سه‌یركردنه‌كه‌ به‌بێ شه‌هوه‌ت بێت و كاریگه‌ری له‌سه‌ر نه‌بێت ئه‌وا دروسته‌ به‌ به‌ڵگه‌ی ئه‌و فه‌رموده‌ی كه‌ باسی یاریكردنی حه‌به‌شیه‌كان ده‌كات له‌ناو مزگه‌وت له‌رۆژی جه‌ژندا كه‌ دایكه‌ عائیشه‌ - ڕه‌زای خوای لێ بێ - له‌دوای پێغه‌مبه‌ری خوا صلی الله علیه وسلم سه‌یری كردوون .

وه‌ ئه‌م بۆچوونه‌ هه‌موو زانایان له‌سه‌ری كۆ ده‌نگ نین بۆیه‌ بۆ ئافره‌ت باشتر و سه‌لامه‌تتر ئه‌وه‌یه‌ كه‌ به‌هه‌موو شێوه‌یه‌ك خۆی له‌سه‌یركردنی پیاوی نامه‌حره‌م بپارێزێت ئه‌گه‌رچی مامۆستای ئایینی و قورئان خوێنیش بێت بۆ ئه‌وه‌ی تووشی فیتنه‌ نه‌بێت و شه‌یتان فێڵی لێ نه‌كات و كاریگه‌ری له‌سه‌ر دروست نه‌كات ؛ به‌تایبه‌تی ئه‌گه‌ر ئافره‌ت مێردی هه‌بوو وه‌ مێرده‌كه‌ی پێی ناخۆش بوو سه‌یری مامۆستا پیاوه‌كه‌ بكات یان پێی ناخۆش بوو سه‌یری قورئان خوێنه‌كه‌ بكات ئه‌وا واجبه‌ له‌سه‌ری گوێڕایه‌ڵی مێرده‌كه‌ی بكات و سه‌یری هیچ پیاوێكی نامه‌حره‌م نه‌كات ئه‌گه‌رنا زۆر گوناهبار ده‌بێت .

_ وه‌ خوشكی باوه‌ڕدار ئاگاداربه‌ !  دروست نیه‌ وێنه‌ی مامۆستایانی ئایینی و قورئان خوێنان له‌سه‌ر پرۆفایله‌كه‌ت دابنێی یان بڵاوی بكه‌یته‌وه‌ له‌ناو تۆره‌ !‌ زۆر ئاگاداری خۆتبه‌ و پارێزگار و ته‌قواداربه‌ .

وصلی الله عله‌ نبینا محمد وعلی آله وصحبه وسلم

نوسینی : مامۆستا هه‌ڵگورد مصطفى گه‌ڵاڵه‌یی .

19 / محرم / 1443 ك – 28 / 8 / 2021 م