ئایه‌ ڕاسته‌ دوعا كردن له‌لای گؤڕی پێغمبه‌ران و پیاوچاكان قه‌بووله‌ ؟! وه‌ ئایه‌ راسته‌ دوعای پێغه‌مبه‌ر زه‌كه‌ریا (علیه السلام ) له‌به‌ر مه‌قامی مه‌ریه‌م قه‌بوول بووه‌ ؟!

ئایه‌ ڕاسته‌ دوعا كردن له‌لای گؤڕی پێغمبه‌ران و پیاوچاكان قه‌بووله‌ ؟!

وه‌ ئایه‌ راسته‌ دوعای پێغه‌مبه‌ر زه‌كه‌ریا (علیه السلام ) له‌به‌ر مه‌قامی مه‌ریه‌م قه‌بوول بووه‌ ؟!

 

وه‌ڵام :

بێگومان هیچ به‌ڵگه‌یه‌ك له‌ قورئان و سونه‌ت نه‌هاتووه‌ له‌سه‌ر قه‌بوول بوونی دوعا له‌لای گۆڕی پێغه‌مبه‌ران و پیاوچاكان .

خوای په‌وره‌ردگار فه‌رموویه‌تی : ( وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ ) . البقرة : 186 .

 واته‌ : ئه‌ی محمد (صلی الله‌ علیه‌ وسلم) ئه‌گه‌ر به‌نده‌كانم پرسیاری منیان له‌تۆ كرد ئه‌وه‌ به‌دڵنیایی من نزیكم لێیانه‌وه‌ ، وه‌ڵامی دوعاكار ده‌ده‌مه‌وه‌ كاتێك لێم ده‌پارێته‌وه‌ ، ده‌با ئه‌وانیش به‌ده‌م بانگه‌وازی منه‌وه‌ بێن و باوه‌ڕی دامه‌زراو به‌ من بهێنن بۆ ئه‌وه‌ی ڕێگای راست به‌ده‌ست بهێنن و بیگرنه‌به‌ر .

 

ئه‌م ئایه‌ته‌ پیرۆزه‌ روون و ئاشكرایه‌ كه‌ خوای په‌روه‌ردگار لێمان نزیكه‌ له‌هه‌رشوێنێك بین ؛ نه‌یفه‌رمووه‌ بۆ ئه‌وی وه‌ڵامتان بده‌مه‌وه‌ برۆن بۆلای گۆڕی پێغه‌مبه‌ران و پیاوچاكان .

 

وه‌ له‌هیچ فه‌رمووده‌یه‌كدا نه‌هاتووه‌ پێغه‌مبه‌ری خوا (صلی الله علیه وسلم) بیفه‌رمووبێت یه‌كێك له‌وشوێنانه‌ی دوعای تیادا قه‌بووله‌ بریتیه‌ له‌ دوعاكردن له‌لای گۆڕی پێغه‌مبه‌ران و پیاوچاكان – دروود و سه‌ڵامی خوای په‌روه‌ردگاریان له‌سه‌ربێت - .

 

وه‌ سه‌باره‌ به‌ وه‌ڵانی ئه‌و گومانه‌ی وتراوه‌ كه‌ گوایه‌ به‌هۆی مه‌قامی مه‌ریه‌م – علیها السلام – دوعای پێغه‌مبه‌ر زه‌كه‌ریا – علیه السلام – قه‌بوول بووه‌ ؛ ده‌ڵێن ئه‌وه‌ به‌ڵگه‌یه‌ كه‌ له‌لای گۆڕی شێخ و پیاوچاكان دوعا قه‌بوول ده‌بێت !

له‌وه‌لامدا ده‌ڵێین :

هه‌رگیز ئه‌م رووداوه‌ نابێت به‌ به‌ڵگه‌ بۆ ئه‌و مه‌به‌سته‌ی باس ده‌كرێت ؛ چونكه‌ :

1_ پێغه‌مبه‌ر زه‌كه‌ریا – علیه السلام – كاتێك رزق و رۆزی به‌هه‌شتی له‌لای مه‌ریه‌م بینی له‌خوا پارایه‌وه‌ كه‌ وه‌ك چۆن رۆزی به‌هه‌شتی به‌مه‌ریه‌م به‌خشیوه‌ منداڵێكیش به‌و ببه‌خشێت ؛ له‌به‌ر ئه‌وه‌ بووه‌ دوعاكه‌ نه‌ك له‌به‌ر گه‌وره‌یی و گیرابوونی دوعا له‌به‌ر ئاماده‌بوون له‌لای مه‌ریه‌م – علیها السلام - .

2_ پێغه‌مبه‌ر زه‌كه‌ریا – علیه السلام – نه‌چۆته‌ لای گۆڕی كه‌سێك دوعا بكات و دوعاكه‌ی به‌هۆی ئاماده‌بوونی له‌لای گۆره‌كه‌ گیرابێت .

3_ پێگه‌ی پێغه‌مبه‌ر زه‌كه‌ریا – علیه السلام - زۆر گه‌وره‌تره‌ له‌ پێگه‌ی مه‌ریه‌م – علیها السلام - ؛ ئایه‌ چۆن ده‌بێت له‌خۆته‌وه‌ به‌بێ به‌ڵگه‌ بڵێی خوا دوعای پێغه‌مبه‌ر زه‌كه‌ریای قه‌بول كرد له‌به‌ر ئامادبوونی له‌لای مه‌ریه‌م – درود و سه‌لامی خوای په‌وره‌ردگاریان له‌سه‌ربێت - ؟!

 

بۆیه‌ هیچ به‌ڵگه‌یه‌ك نیه‌ له‌قورئانی پیرۆز و فه‌رمووده‌كانی پێغه‌مبه‌ری خوا (صلی الله علیه وسلم) له‌سه‌ر گیرابوونی دوعا له‌لای گۆڕی پێغه‌مبه‌ران و پیاوچاكان – دروود و سه‌لامی خوای په‌روه‌ردگاریان له‌سه‌ربێت - .

 

شێخی ئیسلام ئیبن ته‌یمییه‌ - ره‌حمه‌تی خوای لێبیت – فه‌رموویه‌تی : ( ولم يكن أحد من السلف يأتي إلى قبر نبي أو غير نبي لأجل الدعاء عنده ) . الإقتضاء لإبن تيمية : 2 / 284 .

واته‌ : هیچ یه‌كێك له‌ پێشینه‌ چاكه‌كان نه‌چۆته‌ لای گۆڕی پێغه‌مبه‌رێك یان گۆری جگه‌ له ‌پێغه‌مبه‌رێك به‌ مه‌به‌ستی دوعا كردن له‌لای گۆره‌كه‌ی .

وه‌ فه‌رموویه‌تی : ( فالزيارة على هذه الوجوه كلها مبتدعة لم يشرعها النبي صلى الله عليه وسلم، ولا فعلها الصحابة لا عند قبر النبي صلى الله عليه وسلم ولا عند غيره، وهي من جنس الشرك وأسباب الشرك ) . قاعدة جليلة في التوسل والوسيلة : 1 / 35 .

واته‌ : ئه‌م جۆره‌ سه‌ردانكردنانه‌ گشتی بیدعه‌ و داهێنراون ؛ پێغه‌مبه‌ری خوا (صلی الله علیه وسلم) به‌شه‌رعی دانه‌ناون ؛ وه‌ هاوه‌ڵان ئه‌وكاره‌یان نه‌كردووه‌ ؛ نه‌ له‌لای گۆری پێغه‌مبه‌ری خوا (صلی الله علیه وسلم) وه‌ نه‌ له‌لای گۆری جگه‌ له‌ پێغه‌مبه‌ری خوا (صلی الله علیه وسلم) ؛ ئه‌مه‌ له‌جۆری شیركه‌ وه‌ له‌هۆكاره‌كانی تووش بوون به‌ شیركه‌ !

وه‌ فه‌رموویه‌تی : ( قوم نوح كان أصل شركهم العكوف على قبور الصالحين ) . التوسل والوسيلة لإبن تيمية : 39 .

واته‌ : گه‌لی نوح – علیه السلام - بنچینه‌ی شیركه‌كه‌یان مانه‌وه‌یان بوو له‌لای گۆڕی پیاوچاكان !

نوسینی : مامۆستا هه‌ڵگورد مسته‌فا گه‌لاڵه‌یی .

22 ره‌مه‌زان 1446 ك

22 / 3 / 2025 ز